पूर्वपश्चिम राजमार्गमा निजी कार दुर्घटनाग्रस्त
बरहथवा (सर्लाही)। पूर्वपश्चिम राजमार्गअन्तर्गत सर्लाहीको ईश्वरपुर नगरपालिका क्षेत्रमा भएको सवारी दुर्घटनामा एक युवकको मृत्यु भएको छ भने अन्य तीन जना घाइते भएका छन्।
जिल्ला प्रहरी कार्यालय सर्लाहीका प्रवक्ता सरोज राईका अनुसार आज बिहान लु३च ५४७२ नम्बरको निजी कार दुर्घटना हुँदा बुटबल उपमहानगरपालिका-१ का २७ वर्षीय शुभम् जैसवालको मृत्यु भएको हो।
काँकरभिट्टाबाट बुटवलतर्फ गइरहेको उक्त कारका चालक बुटबल उपमहानगरपालिका-१ का २३ वर्षीय साहिल बर्मा तथा सोही स्थानका ४८ वर्षीय वृजकिशोर बर्मा र ५२ वर्षीय सञ्जय जैसवाल घाइते भएका छन्।
घाइते सबैको बर्दिबासस्थित शुभस्वस्तिक अस्पतालमा उपचार भइरहेको प्रहरीले जनाएको छ। घाइतेमध्ये सञ्जय जैसवालको अवस्था गम्भीर रहेको छ।
दुर्घटनाको कारणबारे अनुसन्धान भइरहेको प्रहरीले जनाएको छ।
