११ पुस, बर्दिबास, महोत्तरी। मानवता र सामाजिक उत्तरदायित्वलाई केन्द्रमा राख्दै महोत्तरी चेम्बर अफ कमर्सले इलाका प्रहरी कार्यालय बर्दिबासमा रहेका थुनुवाहरूका लागि विद्युतीय पानी डिस्पेन्सर सहयोग प्रदान गरेको छ।
मिति २०८२ साल पुस १० गते महोत्तरी चेम्बर अफ कमर्सका प्रतिनिधिहरूले उक्त डिस्पेन्सर इलाका प्रहरी कार्यालय बर्दिबासका प्रमुख डिएसपी विकास बामलाई औपचारिक रूपमा हस्तान्तरण गरेका हुन्। जाडो मौसममा थुनुवाहरूलाई स्वच्छ तथा तातो पिउने पानीको सहज पहुँच सुनिश्चित गर्ने उद्देश्यले सहयोग गरिएको चेम्बरले जनाएको छ।
सहयोग सामग्री ग्रहण गर्दै डिएसपी बामले महोत्तरी चेम्बर अफ कमर्सप्रति आभार व्यक्त गर्नुभयो। उहाँले यस्ता समाजसेवी तथा मानवतामूलक कार्यहरूले सकारात्मक सामाजिक सन्देश प्रवाह गर्नुका साथै निजी क्षेत्र र सुरक्षानिकायबीचको आपसी सहकार्यलाई थप मजबुत बनाउने बताउनुभयो।
कार्यक्रममा महोत्तरी चेम्बर अफ कमर्सका पदाधिकारी तथा सदस्यहरूको उपस्थिति रहेको थियो। चेम्बरले आगामी दिनहरूमा पनि मानवता, समाजसेवा र थुनुवाहरूको हितलाई केन्द्रमा राखी यस्ता सहयोगात्मक कार्यहरू निरन्तर रूपमा गर्दै जाने प्रतिबद्धता व्यक्त गरेको छ।
यस सहयोगले थुनुवाहरूको दैनिक जीवनलाई सहज बनाउनुका साथै सामाजिक उत्तरदायित्व निर्वाहमा निजी क्षेत्रको सक्रिय भूमिका रहेको सन्देश दिएको छ।
