Deep Diamond
जेठ २२ । भारतमा लोकसभा चुनावको मतगणना जारी छ ।
स्थानीय समय अनुसार मंगलबार बिहान ८ बजेबाट सुरु भएको प्रारम्भिक चरणको मतगणनामा भारतीय जनता पार्टीले अग्रता लिएको छ ।
केही क्षेत्रमा मतगणना सुरु भइसकेको र केही क्षेत्रमा मतगणनाको तयारी भइरहेको भारतीय सञ्चारमाध्यमले लेखेका छन् ।
टाइम्स अफ इन्डियाका अनुसार यो समाचार लेखेसम्म ३९० सिटमा मतगणना जारी छ ।
जसमध्ये भारतीय जनता पार्टी १९२ सिटमा अगाडि छ भने कांग्रेस ७४ सिटमा अगाडि छ । अन्य राष्ट्रिय तथा क्षेत्रीय दलका उम्मेदवार ११६स्थानमा अगाडि छन् ।
मतगणना सुरु भएको डेढ घण्टापछि यस्तो नतिजा आएको हो । आज साँझसम्म अन्तिम नतिजा आउने बताइएको छ ।
गुजरातको सुरत सिटमा भारतीय जनता पार्टीका मुकेश दलाल निर्विरोध निर्वाचित भइसकेका छन् ।
त्यहाँ कांग्रेसका उम्मेदवारको उम्मेदवारी खारेज भएपछि बाँकी स्वतन्त्र उम्मेदवारले पनि उम्मेदवारी फिर्ता लिएका थिए।
बहुमत ल्याउन र सरकारको नेतृत्व गर्न २७२ सिट जित्नुपर्छ ।
यस वर्ष भाजपा एनडीए र कांग्रेस भारतले गठबन्धन बनाएर चुनाव लडेका थिए। भारतका विभिन्न संघसंस्था र सञ्चारमाध्यमले यस वर्ष पनि भाजपा नेतृत्वको एनडिए गठबन्धनले बहुमत ल्याउने प्रक्षेपण गरेका थिए ।
