काठमाडौँ , १९ जेठ । ललितपुरमा मोटरसाइकल र स्कुटर ठोक्किँदा दुवै सवारी साधनका चालकको मृत्यु भएको छ ।
गएराति साढे १२ बजे ललितपुरको महालक्ष्मी नगरपालिका–४ टेम्पो पार्क नजिक बा ८३ प ५२६७ नम्बरको मोटरसाइकल र बा ५६ प ५०५६ नम्बरको स्कुटर एक आपसमा ठोक्किँदा दुवै सवारी साधनका चालक गम्भीर घाइते भएका थिए।
जिल्ला प्रहरी परिसर ललितपुरका सूचना अधिकारी एसपी नरेशराज सुवेदीका अनुसार स्कुटर चालक काठमाडौं साखु घर भई डल्लु बस्ने २१ वर्षीय आयुष श्रेष्ठको उपचारका क्रममा बिहान मृत्यु भएको थियो।
ललितपुरको किष्ट अस्पतालमा बिहान साढे २ बजे उनको मृत्यु भएको एसपी सुवेदीले जानकारी दिए।
मोटरसाइकलका चालक खोटाङको साकेला घर भई ललितपुरको लुभु बस्ने २६ वर्षीय लकेश राईलाई उपचारका लागि बि एन्ड बी अस्पताल पुर्याइएको थियो।
उनको पनि उपचारका क्रममा आज बिहान ६स्२५ बजे मृत्यु भएको एसपी सुवेदीले जानकारी दिए।
