काठमाडौं, पुस २७ गते ।
सत्तारुढ गठबन्धनले राष्ट्रियसभाका उम्मेदवारका लागि प्रदेशस्तरमा पनि निर्वाचन समन्वय समिति गठन गर्न थालेको छ ।
राष्ट्रियसभामा गठबन्धनका उम्मेदवारलाई जिताउन सबै प्रदेश र जिल्लामा समन्वय समिति गठन गर्ने केन्द्रीय निर्णयअनुसार वाग्मतीमा समन्वय समिति गठन गरिएको छ ।
बागमतीमा तीन सदस्यीय समन्वय समिति गठन भएको छ । निर्वाचनलाई एकीकृत रुपमा गर्न कांग्रेस प्रदेश सभापति इन्द्रबहादुर बानियाँको संयोजकत्वमा समिति गठन गरिएको छ । समितिमा माओवादी केन्द्रका वाग्मती प्रदेश अध्यक्ष सरल सहयात्री पौडेल र संयुक्त समाजवादी पार्टीकी प्रदेश सभापति सावित्रा भुसाल सदस्य छन् ।
प्रदेश सभा भित्रका सदस्यहरुको समन्वय गर्न अर्को समन्वय समिति गठन गरिएको छ । सो समितिको संयोजकत्व वाग्मती प्रदेशका मुख्यमन्त्री शैलकाराम जमकट्टेललाई दिइएको छ । समितिमा कांग्रेस संसदीय दलका नेता बहादुरसिंह लामा र संयुक्त समाजवादी पार्टीका नेता कृष्ण खनाल थप सदस्यमा मनोनित भएका छन् ।
नगरपालिका महासंघ बागमती प्रदेश अध्यक्ष उपेन्द्र कार्कीलाई प्रदेशभित्रका नगरपालिका, उपमहानगरपालिका र नगरपालिकाका प्रमुख र उपप्रमुखसँग समन्वय गर्ने जिम्मेवारी दिइएको छ ।
वाग्मती प्रदेश अध्यक्ष कर्णबहादुर थापा मगरलाई गाउँपालिकाको अध्यक्ष र उपाध्यक्षको लागि संयोजकत्व दिइएको छ ।
श्रोत onlinekhabar
