ढल्केवर, धनुषा
धनुषास्थित मिथिला नगरपालिकाको नेकपा एमालेबाट नगर प्रमुखका प्रत्यासी उम्मेदवार राजाराम महतोसँगै निर्वतमान नगरप्रमुख घरदैलो कार्यक्रममा सहभागी भएपछि कार्यकर्ताहरु उत्साहित देखिएका छन् ।
नेकपा एमालेका केन्द्रीय सदस्यसमेत रहेका निर्वतमान नगर प्रमुख हरिनारायण शुक्रबार मिथिला नगरपालिका वडा नं. ७ मा भएको घरदैलो कार्यक्रममा सहभागी भएका थिए । मतदातासँग मत माग्न गएको आइतबारबाट राजारामले घरदैलो अभियान सुरु गरेका थिए । घरदैलो अभियान शुभारम्भमा केही समयका लागि निर्वतमान नगर प्रमुख सहभागी भएपनि त्यसयता उनी राजारामले गरेको घरदैलो कार्यक्रममा सहभागी जनाएका थिएन् ।
घरदैलो कार्यक्रममा निर्वतमान नगरप्रमख सहभागी नहुँदा खिन्नता महसुश गरिरहेका थिए । अब भने उनको सहभागिताले समर्थक तथा उम्मेदवारहरु प्रफुल्लित देखिएका छन् ।
दोस्रो पटक नगर प्रमुखको उम्मेदवार बनाउन स्थानीय कार्यसमिति, जिल्ला र प्रदेशसमेत निर्वतमान निर्वतमान हरिनारायणको नाम सिफारिस गरेपनि मनोनयन दर्ताको अन्तिम दिनमा केन्द्रीय नेतृत्वले पार्टीको टिकट एमालेकै अर्का कार्यकर्ता राजाराम दिएको थियो ।
अन्तिम समयमा आएर टिकट अर्कैलाई दिएको भन्दै पार्टी नेतृत्वसँग रुष्ट हुँदै स्वतन्त्र उम्मेदवारी दर्ता गराएका थिए । त्यसपछि पार्टी नेतृत्वसँगको छलफल पश्चात पार्टीले टिकट दिएका राजारामलाई नै सघाउने भन्दै उनले आफ्नो स्वतन्त्र उम्मेदवारी फिर्ता लिएका थिए ।
