२१ चैत, बर्दिबास – बर्दिबास चौक आसपासका क्षेत्र एक सातादेखि बाक्लो धुवाँको चपेटामा परेको छ। स्थानीय जङ्गलमा दिनहुँ लागिरहेको आगोका कारण बालबालिका, जेष्ठ नागरिक लगायत सर्वसाधारणको जनजीवन प्रभावित बनेको छ।
आगलागीका कारण समस्या बढ्दै बर्दिबासमा
बर्दिबास नगरपालिकाका विभिन्न जङ्गली क्षेत्रहरूमा दिनहुँजसो आगलागी भइरहेको छ। यसका कारण हावामा धुवाँको मात्रा अत्यधिक बढेको छ, जसले गर्दा स्वासप्रश्वाससम्बन्धी समस्या निम्तिएको छ। स्थानीय अस्पतालहरूमा दम, खोकी तथा आँखा पोल्ने समस्याका बिरामीहरू बढ्न थालेका छन्।
स्थानीय बासिन्दा रामहरि महतो भन्छन्, “बिहानदेखि बेलुका सम्म आँखा पोल्ने, सास फेर्न गाह्रो हुने अवस्था छ। बालबालिका र वृद्धवृद्धा झनै समस्यामा छन्। तर, आगलागी नियन्त्रण गर्ने पहल खासै भएको छैन।”
नियन्त्रणका लागि पहल आवश्यक
नगरपालिकाका अनुसार जङ्गलमा लागेको आगो धेरैजसो प्राकृतिक कारणले वा मानवीय लापरवाहीका कारण भएको हुनसक्छ। मौसम गर्मिदै गएकाले आगो थप फैलिने सम्भावना छ। स्थानीय निकाय तथा सरोकारवाला निकायहरूले तुरुन्तै आवश्यक कदम चाल्नुपर्ने देखिन्छ।
स्थानीय प्रशासनले आगलागी नियन्त्रणका लागि वन अधिकृत तथा सुरक्षाकर्मीहरू परिचालन गरिसकेको बताएको छ। बर्दिबास नगरपालिकाका प्रमुख प्रहलाद कुमार क्षेत्रीले भने, “हामी आगलागी नियन्त्रणका लागि प्रयासरत छौं। नागरिकलाई सचेत रहन अनुरोध गर्छौं।” जुन जुन स्थानमा आगो लागेको छ नगरपालिकाको बारुनयन्त्र गाडी २४ सै घण्टा खटिएका छ्न ।
तर, समस्या समाधानका लागि तत्काल कदम नचालिए जनस्वास्थ्यमा गम्भीर असर पर्ने खतरा देखिन्छ। स्थानीयवासीले आगो नियन्त्रणका लागि दमकल सेवा तथा वन विभागलाई अझ सक्रिय बनाउन माग गरेका छन्।
बर्दिबास चौकमा फैलिएको धुवाँले आमनागरिकको जनजीवन प्रभावित पारेको छ। आगलागी नियन्त्रणका लागि स्थानीय प्रशासन र सम्बन्धित निकायले अझै प्रभावकारी उपायहरू अवलम्बन गर्नु जरुरी छ। अन्यथा, यसले ठूलो स्वास्थ्य संकट निम्त्याउने सम्भावना रहन्छ।
