धनुषा । भारतबाट ल्याउँदै गरेको १६१ ग्राम ९७० मिलिग्राम खैरो हेरोइनसहित धनुषामा एक युवक पक्राउ परेका छन्।
गोप्य सूचनाका आधारमा लागूऔषध नियन्त्रण ब्युरो, शाखा कार्यालय बर्दिबासबाट खटिएको प्रहरी टोलीले धनुषाको जनकपुरधाम उपमहानगरपालिका-१४ बाट सर्लाहीको लालबन्दी नगरपालिका-५ ठेगाना भएका २८ वर्षीय अरविन्द साह (कानु) लाई पक्राउ गरेको हो।
प्रहरीका अनुसार साहले भारतको पिप्रौन क्षेत्रबाट खैरो हेरोइन खरिद गरी धनुषाको जटही नाका हुँदै काठमाडौंका विभिन्न स्थानमा बिक्री-वितरण गर्ने उद्देश्यले ल्याउँदै गरेको अवस्थामा पक्राउ गरिएको हो।
उनको साथबाट १६१ ग्राम ९७० मिलिग्राम खैरो हेरोइन, प्रदेश नं. २-०२-००१ प ७५८९ नम्बरको मोटरसाइकल र एक थान मोबाइल बरामद भएको प्रहरीले जनाएको छ।
पक्राउ परेका साहलाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय धनुषामा बुझाइएको लागूऔषध नियन्त्रण ब्युरोले जनाएको छ।
