१४ फागुन, जनकपुरधाम। धनुषाको औरही गाउँपालिका-६ स्थित खेतमा एक युवकको हत्या गरिएको अवस्थामा शव फेला परेको छ।
प्रहरीका अनुसार दुवै हात पछाडि गम्छाले बाँधिएको अवस्थामा घाँटी रेटेर हत्या गरिएको देखिएको छ। मृतक हंसपुर नगरपालिका-९ रुदौलीका २० वर्षीय सुमित मण्डल रहेको जिल्ला प्रहरी कार्यालय धनुषाका प्रवक्ता डीएसपी गणेश बमले जानकारी दिए।
बिहीबार अपराह्न करिब ४ बजेतिर घटनाबारे प्रहरीलाई सूचना प्राप्त भएको थियो। परिवारजनका अनुसार सुमित बुधबार साँझ मोटरसाइकल लिएर घरबाट निस्केका थिए र त्यसपछि सम्पर्कविहीन भएका थिए।
घटनाको प्रकृति हेर्दा बुधबार राति नै उनको हत्या भएको हुनसक्ने प्रहरीको प्रारम्भिक अनुमान छ। घटनाबारे थप अनुसन्धान भइरहेको प्रहरीले जनाएको छ।
