जनकपुरधाम। विवाह पंचमी महोत्सवको अवसरमा जनकपुरधाम क्षेत्रमा मदिरा बिक्री-वितरण तथा पशुपन्छी काट्न, माछा-मासु बिक्री वितरण गर्न जिल्ला प्रशासन कार्यालय धनुषाले निषेधाज्ञा जारी गरेको छ।
जिल्ला सुरक्षा समितिको निर्णयअनुसार मंसिर ९ गते राति १२:०० बजेदेखि मंसिर १० गते राति १२:०० बजेसम्म जनकपुरधाम उपमहानगरपालिकाको परिधि क्षेत्र तथा परिक्रमा मार्गमा मदिरा बिक्री-वितरण, पशुपन्छी वध, माछा-मासु बिक्री एवं अन्य नाच-गान लगायतका कार्यक्रममा पूर्णरूपमा रोक लगाइएको प्रशासनले जनाएको छ।
रामजानकी विवाह–पञ्चमी महोत्सवलाई सुरक्षित, मर्यादित र सोह्रश्रृंगारयुक्त बनाउन भन्दै प्रशासनले सार्वजनिक सूचना जारी गरेको हो। सूचनामा उल्लेख भएअनुसार तोकिएको क्षेत्रभित्र कुनै पनि किसिमको मदिरा तथा मासुजन्य गतिविधि पाए कानूनी कारबाही हुने चेतावनी समेत दिइएको छ।
