कलैया – बाराको सिम्रौनगढ नगरपालिका – २ नयका टोलमा प्रहरीले ठूलो परिमाणको लागूऔषध गाँजा बरामद गरेको छ। जिल्ला प्रहरी कार्यालय बाराले जारी गरेको प्रेस विज्ञप्ति अनुसार, विशेष सूचनाको आधारमा शुक्रबार साँझ साढे ७ बजे गरिएको छापामारीबाट १३८ किलो ७ सय ग्राम गाँजा बरामद गरिएको हो।
इलाका प्रहरी कार्यालय सिम्रौनगढका प्रहरी निरीक्षक पवन पछाईको कमान्डमा खटिएको टोलीले ३५ वर्षीया रिता देवी यादवको घर खानतलासी गर्दा खाटमुनि जुट र प्लास्टिकको बोरा भित्र लुकाइराखिएको अवस्थामा गाँजा फेला परेको जनाएको छ।
प्रहरीले घरधनी यादवलाई नियन्त्रणमा लिएर थप अनुसन्धान भइरहेको प्रहरी नायब उपरीक्षक तथा प्रवक्ता विजयराज पण्डितले जानकारी दिएका छन्।
