२२ साउन, काठमाडौं – नेपाल पत्रकार महासंघले अनलाइन मिडियाको दर्ता तथा नवीकरण प्रक्रियामा अपारदर्शिता र मनपरी भएको भन्दै गम्भीर ध्यानाकर्षण गराएको छ। महासंघले जारी गरेको प्रेस विज्ञप्तिमा सञ्चार तथा सूचना प्रविधि मन्त्रालयअन्तर्गत प्रमुख जिल्ला अधिकारीमार्फत् गरिने दर्ता तथा नवीकरण प्रणालीमा एकीकृत नीतिको अभाव, अव्यवस्था र अनियमितता देखिएको उल्लेख गरिएको छ।
महासंघका महासचिव रमेशप्रसाद दहालले हस्ताक्षर गरेको विज्ञप्तिमा सरोकारवाला पक्षसँगको परामर्श बिना नीति निर्माण गरिनु आपत्तिजनक रहेको जनाइएको छ। साथै, पाँच हजारभन्दा बढी अनलाइन सञ्चारमाध्यममध्ये थोरै मात्र मिडिया दर्ता तथा नवीकरण प्रक्रियामा सहभागी गराइएकामा पनि पारदर्शिता नरहेको आरोप लगाइएको छ।
महासंघले दर्ता तथा नवीकरणको एकीकृत नीति तत्काल निर्माण गरी सूचना तथा सञ्चार प्रविधि मन्त्रालयको पूर्ण समन्वयमा प्रक्रिया अघि बढाउन सरकारसँग आग्रह गरेको छ। साथै अनलाइन मिडियाको स्वच्छ सञ्चालनका लागि प्रेस स्वतन्त्रताको मर्म नबिर्सन चेतावनी दिइएको छ।
