न्युयोर्क- ब्राजिलका स्टार फरवार्ड नेयमारले अन्तर्राष्ट्रिय फुटबलबाट संन्यासको घोषणा गरेका छन्। फिफा विश्वकप २०२६ को अन्तिम १६ अन्तर्गत नर्वेसँग २–१ ले पराजित हुँदै ब्राजिल प्रतियोगिताबाट बाहिरिएपछि ३४ वर्षीय नेयमारले राष्ट्रिय टोलीबाट बिदा लिएका हुन्।
आइतबार राति अमेरिकाको न्यु जर्सीस्थित मेटलाइफ स्टेडियममा भएको खेल सकिएलगत्तै नेयमार भावुक बनेर मैदानमै रोएका थिए। उनका सहकर्मी खेलाडीहरूले उनलाई सम्हालेका थिए। यस हारसँगै ब्राजिल सन् १९९० यता पहिलो पटक विश्वकपको अन्तिम १६ बाटै बाहिरिएको छ।
खेलमा नर्वेका स्टार फरवार्ड एर्लिङ हालान्डले दुई गोल गर्दै टोलीलाई क्वार्टरफाइनलमा पुर्याए। ब्राजिलका लागि नेयमारले इन्जुरी समयमा पेनाल्टीमार्फत सान्त्वना गोल फर्काएका थिए।
खेलपछि सञ्चारकर्मीसँग कुरा गर्दै नेयमारले भने, “मैले धेरै प्रयास गरेँ। तर अब यो यात्रा यहीं समाप्त भयो। मैले यही मैदानबाट राष्ट्रिय टोलीको यात्रा सुरु गरेको थिएँ र यहीँ आएर अन्त्य पनि भयो।”
नेयमारले सन् २०१० को अगस्टमा संयुक्त राज्य अमेरिकाविरुद्धको मैत्रीपूर्ण खेलबाट मेटलाइफ स्टेडियममै ब्राजिलको राष्ट्रिय टोलीमा डेब्यु गरेका थिए। सोही खेलमा उनले आफ्नो पहिलो अन्तर्राष्ट्रिय गोल पनि गरेका थिए।
चोटका कारण पछिल्ला केही वर्ष कठिन बने पनि नेयमारले ब्राजिलका लागि १३० खेल खेल्दै ८० गोल गरेका छन्। यससँगै उनले महान् फुटबलर पेलेको ७७ गोलको कीर्तिमानलाई उछिन्दै ब्राजिलको इतिहासमा सर्वाधिक अन्तर्राष्ट्रिय गोल गर्ने खेलाडीको कीर्तिमान कायम गरेका छन्।
नर्वेविरुद्ध गरेको गोलसँगै नेयमार पेलेपछि चार फरक विश्वकपमा गोल गर्ने दोस्रो ब्राजिलियन पुरुष खेलाडी पनि बने।
यता ब्राजिलका मुख्य प्रशिक्षक कार्लो एन्सेलोटीले टोलीमा अब “नयाँ अध्याय” सुरु गर्ने समय आएको बताएका छन्। उनले भने, “यो हार निकै पीडादायी छ। हामी सबै निराश छौँ। हामी हार्न योग्य थियौँ भन्ने लाग्दैन, तर फुटबलमा यस्तै हुन्छ। अब यो हारबाट पाठ सिक्दै नयाँ योजनाका साथ अगाडि बढ्नेछौँ।”
