४ फागुन, रौतहट। इलाका प्रहरी कार्यालय चन्द्रनिगाहपुरले लागुऔषध ब्राउन सुगरसहित चार जनालाई पक्राउ गरेको छ।
गोप्य सूचनाका आधारमा खटिएको प्रहरी टोलीले चन्द्रपुर-४ क्षेत्रबाट वडा नम्बर-१ बागमतीका ३२ वर्षीय तुलबहादुर लामालाई नियन्त्रणमा लिएको थियो। उनको शरीर खानतलासी गर्दा लगाएको जिन्सको खल्तीबाट ब्राउन सुगर सेवन गर्न प्रयोग हुने रु. ५ को फोल्ड, ब्लेडलगायत सामग्री फेला परेको प्रहरीले जनाएको छ।
उनलाई सोधपुछ गर्ने क्रममा प्राप्त सूचनाका आधारमा प्रहरीले चन्द्रपुर-४ गणेशचोकस्थित दुर्गाबहादुर घलेको घरमा डेरा गरी बस्ने अन्य तीन जनालाई समेत पक्राउ गरेको हो। पक्राउ पर्नेमा उदयपुर गाईघाटकी २३ वर्षीया प्रिया तामाङ, चन्द्रपुर-४ बस्ने ३५ वर्षीय राज बलम पाख्रिन मगर र २९ वर्षीय प्रशान्त तामाङ रहेका छन्। उनीहरूबाट २ सय ४० मिलिग्राम ब्राउन सुगर बरामद गरिएको प्रहरीले जनाएको छ।
इलाका प्रहरी कार्यालय चन्द्रनिगाहपुरकी प्रमुख रुपा लाबुङका अनुसार पक्राउ परेका चारै जनामाथि थप अनुसन्धान भइरहेको छ।
