महोत्तरी। महोत्तरीको बर्दिबासमा प्रहरीले छुट्टा-छुट्टै स्थानमा छापा मारेर १९ जना व्यक्तिलाई जुवातास खेलिरहेको अवस्थामा नियन्त्रणमा लिएको छ।
मिति २०८२/०७/१३ गते बिहान करिब १० बजे प्राप्त गोप्य सूचनाको आधारमा इलाका प्रहरी कार्यालय बर्दिबासबाट खटिएको टोलीले बर्दिबास नगरपालिका-७, किसाननगर टोलमा कर्णबहादुर तामाङको घरको सटर भएको कोठामा जुवा खेलिरहेको अवस्थामा ७ जनालाई पक्राउ गरेको हो। उनीहरूबाट नगद रु. २,३६,५७५, प्रयोग गरिएको तास पत्ता ५२ थान, सिलबन्दी बन्डल १ थान र खुला तास डब्बामा रहेको तास पत्ता ५२ थान बरामद गरिएको प्रहरीले जनाएको छ।
त्यस्तै मिति २०८२/०७/१४ गते राति करिब १२:३० बजे जिल्ला प्रहरी कार्यालय महोत्तरी र इलाका प्रहरी कार्यालय बर्दिबासको संयुक्त टोलीले बर्दिबास नगरपालिका-५ टुटेश्वर मन्दिर नजिकै जुवातास खेलिरहेका १२ जनालाई पक्राउ गरेको छ। उक्त स्थानबाट प्रहरीले नगद रु. १,३२,०००, कौरा २६ थान, काठको बाकस ३ थान, साथै विभिन्न ब्राण्डका १३ थान मोबाइल फोन समेत बरामद गरेको छ।
पक्राउ परेका सबैलाई आवश्यक कारबाहीका लागि अदालतबाट म्याद थप गराई अनुसन्धान कार्य भइरहेको प्रहरीले जनाएको छ।
